నిన్ను నీవే తెలుసుకో - Ninnu Neeve Telusuko

నిన్ను నీవే తెలుసుకో నిరుహేతుకబంధుఁడ -
వన్నిటాఁ బరతంత్రుఁడ నంతేపో నేను

యేమి గూడీ నేగర్మ మిలపైఁ జేయఁగ నీకు
యేమి మానె నేగర్మ మిటు మానఁగ
భూమినీనాటక మేల పూర్ణ కాముఁడవు నీవు
కామించి కాతువుగాక కరుణానిలయ

యెంత గూడపెట్టితి నే నిలమీఁదఁ బుట్టఁగాను
యెంత నష్టినే జనించ కిట్టుండగా
వింతగుయీయుక్తులెల్ల వృథావాదము లింతే
సంతతము ననుఁ గావు సర్వేశ్వరా

యెవ్వరు విన్నవించేరు ఇటు నాదెస నీకు
యెవ్వరు వద్దనేరు నీ విలఁ గావఁగా
రవ్వల శ్రీవేంకటేశ రక్షింతువుగాక
అవ్వల నివ్వల శరణాగతరక్షకుఁడా

Watch for audio - https://youtu.be/cin6i6Dte4Y 

తలపోసి తలపోసి - Thalaposi Thalaposi

తలపోసి తలపోసి తమకించీ నామనసు
చెలులాల ఆతఁ డేమి సేసీనొకో

యెలయించినవాఁడు ఇంటికి రాఁడొకొ
చెలుల నంపితి మాఁట చేకొనెనొకా
కలువల వేసినాఁడు కరుణించకుండునొకొ
సొలసి చూచినవాఁడు చుట్టమై చిక్కఁడొకొ

మచ్చికచల్లినవాఁడు మంతనములాడడొఁకొ
ఇచ్చగించినాఁడు చనవియ్యఁడొకొ
కచ్చు పెట్టినవ్వేవాఁడు కప్పురవిడె మీఁడొకొ
వచ్చినవాఁడిఁకను నావద్దనే వుండీనొకొ

వేడుక సేసినవాఁడు వీడుజోడై చొక్కఁడొకొ
వాడికచూపినవాఁడు వసమౌనొకొ
యీడనె శ్రీ వేంకటేశుఁడిన్నిటాను నన్ను నేలె
కూడినవాఁడు నాబత్తి గొబ్బన మెచ్చునొకొ

Watch for audio - https://youtu.be/TSB0rq_oEqg 

ఇదియే కామనిదాన - Idiye Kama Nidana

ఇదియే కామనిదాన మిదియే మూలధనము
యిదియే నమ్ముట గాక యితరము లేలా

'న మే భక్తః ప్రణస్యతి' యనుమాట
అమోఘమై నీ వానతియ్యఁగా
రమారమణుఁడ రతి నీ దాసుల కెల్ల
నమో హి నితరవిచారము లేలా

నాఁడు 'మా మేకం శరణం వ్రజ’ యనుమాట
పోడిమి దిక్కుల నీ వెప్పుడు చాటఁగా
నేఁడు నీ దాసులమై నెరవేరితిమి గాక
వేఁడి వేఁడి కర్మపువిధులిడ నేలా

ఆల 'యెగక్షేమం వహామ్యహ' మ్మనుమాట
అలరుచు తుదిపదమై వుండఁగా
నెలవై శ్రీవేంకటేశ నిన్నుఁ గొలిచినమాకుఁ
గలిగె నీ కరుణ యే కథలు నేలా 

Watch for audio - https://youtu.be/XNHPy-YORDk 

కన్నులఁ జూచేవు - Kannula Juchevu

కన్నులఁ జూచేవు మాతో కందువ మాటలాడేవు
కొన్నదికోలు నీకిఁక గోవిందరాజా

పవ్వళించేయప్పుడూను పాదాలొత్తే వారిద్దరు
యివ్వల నే నీతో నవ్వ నేకతమేది
దవ్వుల నుండే మమ్ముఁ దడవేవు నీవొళ్ల
కువ్వలాయ వలపులు గోవిందరాజా

యిద్దిరి చే నిమ్మపండ వేమి సేయవచ్చు నిన్ను
అద్ది నీతో మాటలాడ ననువయ్యీనా
చద్దికి వేఁడి కప్పటి జాణతనా లాడేవు
కొద్దిఁబడవు పనులు గోవిందరాజా

యిరుమొనసూదివి యెవ్వరివాఁడ వందుము
దొరవై నన్నుఁ గూడితి తొల్లె నీవు
తరవాతి చేఁతలెల్ల దక్కె నీకు నిందరిలో
గొరబై శ్రీవేంకటాద్రి గోవిందరాజా

Watch for audio - https://youtu.be/qgG7-eCkvqE 

హరి నీకే శరణని - Hari Neeke Saranani

హరి నీకే శరణని గెలుచుటగాక
యిరవుగ నెరఁగఁగ నెవ్వరితరము

తనువికారములు తరవులు వెట్టిన
కొనయెరుకైనా కొరతవడు
మనసువికారము మమతలఁ దగిలిన
యెనసి యెదురుపడ నెవ్వరితరము

కంతువికారము కన్నులఁగప్పిన
పంతపు విరతియు బయలౌను
చింతాలహరులు చీఁదర రేఁగిన
యింతయు వీడ్కొన వె(నె)వ్వరితరము

అతిగుణవికార మాసలఁ బెట్టిన
సతతయోగములు జడనుపడు
మతి శ్రీవేంకటపతి నిన్నుఁ గొలిచిన
యితరము దగ్గర నెవ్వరితరము 

భావ దర్పణము :
అన్నమయ్య ఈ కీర్తనలో ఒక గొప్ప రహస్యాన్ని వెల్లడిస్తున్నారు. శ్రీహరిని సాధించాలంటే, తన కరుణ గెలవాలంటే స్వామి శరణాగతియే చక్కటి మార్గము. ఎందుకంటే ఆయనను పూర్తిగా నెరుగుట ఎవ్వరి తరమౌతుంది? అటువంటప్పుడు శరణమే సులభము. మానవుని శరీరము కలిగించు వికారములు నిర్బంధించినప్పుడు, దాని తుది పరిణామం తెలిసినా కొరత మిగిలిపోతుంది. అదే మనస్సు కనుక వికారమునకు లోనైతే మమతల వుచ్చులో తగిలి భ్రాంతి చెందుతుంటుంది. అప్పుడు దాని నెదుర్కొనుట యెవ్వరి తరము? మన్మథ వికారము కన్నులను కప్పివేస్తే పంతముతో కూడిన విశ్రాంతి అవసరమౌతుంది. చింతితుడై చిరాకు కలిగినప్పుడు దీనినంతా | ఒక్కసారిగా విడిచిపెట్టడం యెవ్వరి తరమౌతుంది చెప్పండి. గొప్పగుణవికారముచేత, ఆశలో తగులుకొని యెల్లప్పుడూ యోగసాధనలో కూడా వెనకపడిపోవటం జరుగుతుంది. ఓ శ్రీవేంకటపతీ! అప్పుడు మనస్సులో నిన్ను కొలిచినవానికి విషయములు దగ్గరవవు. అట్లా ఆ శరణాగతులను చెడగొట్టుట యెవ్వరి తరము.
* జడనుపడు - మందమతియై వెనకపడిపోవును * విరతి - విశ్రాంతి * తరవులు - నిర్బంధము
(సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు)

Watch for audio - https://youtu.be/kjV8by9RmUc 

విన్నపము సేయవమ్మా - Vinnapamu Seyavamma

విన్నపము సేయవమ్మా విభునికి సుద్దులు
చెన్నుగా నేమిసేతము చెప్పరమ్మా బుద్దులు

యెనలేని వలపుల యీఁతలు
మునుకొన్న నిట్టూర్పుల మోఁతలు
పొనుగొని సిగ్గుల పూఁతలు
వనితకు మరుఁడు సేసిన చేఁతలు

కలసేటి తమకపు కరఁగులు
మలయుఁ జెక్కిటి చేయి మఱఁగులు
సెలసి పయ్యెదజారు చెఱఁగులు
చెలియకే మరుఁడుసేసిన తెఱఁగులు

మరిగిన విరహపు మందులు
వెను (వెర?) కొన్నభావరతి విందులు
యిరవై, శ్రీవేంకటేశుఁ డిందులోనె వచ్చి కూడె
తరుణి కింతసేసిన తగు పొందులు 

English Lyrics
============ 
Vinnapamu seyavamma vibhuniki suddulu
Chennuga nemisetamu chepparamma buddulu 

Yenaleni valapula yeethalu
Munukonna nitturpula mothalu
Ponugoni siggula puthalu
Vanithaku marudu sesina chethulu  

Kalaseti tamakapu karagulu
Malayu jekkiti cheyi maragulu
Selasi payyedhajaaru cheragulu
Cheliyake marudusesina teragulu 

Marigina virahapu mandulu
Verakonna bhavarathi vindulu
Yiravai, Sri Venkateshu dindulone vachchi kude
Taruni kinthasesina tagu pondulu

Watch for audio - https://youtu.be/OtmCTeXuyvM 

కర్మ మెంత మర్మ మెంత - Karma Mentha Marma Mentha

కర్మ మెంత మర్మ మెంత కలిగినకాలమందు
ధర్మ మిది యేమరక తలఁచవో మనసా

చెలువల పొంతనుంటే చిత్తమే చెదురుఁగాని
కలుగనేర దెంతైనా ఘనవిరతి
వులుక కగ్గి పొంతనుంటేఁ గాఁకలేకాక
చలువ గలుగునా సంసారులకును

బంగారువోడ గంటేఁ బట్టనాస వుట్టుఁగాని
సంగతి విజ్ఞానపుజాడకు రాదు
వెంగలి యభిని దింటే వెఱి వెఱాటాడుఁగాక
అంగవించునా వివేకమప్పుడే లోకులకు

శ్రీవేంకటేశుభక్తి చేరితే సౌఖ్యముగాని
ఆవల నంటవు పాపా లతిదుఃఖాలు
చేవ నమృతముగొంటే చిరజీవియగుఁగాని
చావులేదు నోవులేదు సర్వజ్ఞులకును

Watch for audio - https://youtu.be/ukc-uGAytKI 

పోలించి చూచితేను - Polinci Chucithenu

పోలించి చూచితేను పొఁసగు నిద్దరికిని
మేలువారు తొల్లె మీరు వోలలాడరయ్య

కదిసి యింతి నీతో కడు మాఁటలాడఁ గాను
అదె మోవిచిగురులు యల్లాడఁ జొచ్చె
యిదె వసంతకాలము యెదిరించె నీకు నేఁడు
సదరాన వలపులు చల్లులాడరయ్యా

కందువఁ గాంత నిన్నుఁ గాఁగిలించుకొనఁగాను
అందమై బాహులతలు అల్లుకోఁ జొచ్చె
వింతజాజరకాలము వేడుకతోఁ దలఁపించె
సంతోసపుచిరునవ్వు చల్లులాడరయ్యా

ఆంచెల రతివేళల నంగన నిన్నుఁ గూడఁ గా
మించి గుబ్బలపూగుత్తులు మెరయఁ జొచ్చె
కొంచక శ్రీవేంకటేశ కూడె నామనికాలము
చంచలించక యింపులు చల్లులాడరయ్య 

English Lyrics 
------------------------ 
Polinchi chuchitenu posagu niddarikini
Meluvaaru tholle miru volalaadarayya

Kadhisi inthi nito kadu matalada gaanu

Ade movichigurulu yallada jochche
Yide vasamtakaalamu yedirinche niku nedu
Sadarana valapulu challuladarayya 

Kanduva gaantha ninnu gaagilinchukonagaanu
Andamai baahulathalu alluko jochche
Vinthajajarakaalamu vedukato dhalapinche
Santosapuchirunavvu challulaadarayya 

Anchela rathivelala nangana ninnu gudaga
Minchi gubbalapugutthulu meraya jochche
Konchaka Sri Venkatesha kude naamanikaalamu
Chanchalinchaka yimpulu challulaadarayya

Watch for audio - https://youtu.be/DDsYRC7mgxY 

స్వామి వేంకటరమణ - Swami Venkataramana

స్వామి! వేంకటరమణ  యేమిపరాకయ్య
నామనవి యాలించి  నను నేలవయ్య

నీవే నా తల్లివి  నీవే నా తండ్రివి
నీవే నాపాలి పెన్నిధాన మనుచు
నేవేళ నామదిలో  నెంతైన నమ్మితే
భావించి కరుణతో  బ్రోవరా వేమయ్య

ఎందరను రక్షింప  వెంత సెలవుసేయ
వందులో నేను నీ  కవుదునా బరువు
కందర్పగురుఁడ నను  కావవే యిందరిలో
సందడిని మరచేవు  స్వామీ అదేమయ్య

నిన్ను నమ్మినవాని  కన్నడ జేసితే
అన్యు లెవరైన నను  నాదరింతురటయ్య
నన్నేలు కృపతోడ  నాపాలి వేంకటరమణ
నిన్ను నమ్మితి నేను  నీవాఁడనయ్య 

Watch for audio - https://youtu.be/tWdmYOSjlvw 

అవాప్తసకల కాముఁడనుమాట - Avaaptasakala Kaamudanu

అవాప్తసకలకాముఁ డనుమాట నీకుఁ జెల్లె
వివేకించఁ బురుషార్థవిధి మాయందేది

మరిగి నీపై భక్తి మాకుఁ గలుగుటెల్లాను
అరసి నీవు రక్షించే ఆసకొరకే
హరి నీవు భక్తవాత్సల్యము మాపై జేయుటెల్ల
ఇరవైన నీకు నిరుహేతుకమే

కొసరుచు నిన్ను నేము కొలిచినదెల్లాను
వెస మాభారము నీపై వేయుకొరకే
వసముగా నీవు నన్ను వలెనని యేలుటెల్ల
యిసుమంతైన నిరుహేతుకమే

శ్రీవేంకటేశ్వర నీకుఁ జేయెత్తి మొక్కుటయెల్ల
నీవే మావాఁడవై మన్నించుకొరకే
ఆవటించి అంతర్యామివై నీవుండుటయెల్ల
యేవలఁ జూచిన నిరుహేతుకమే

Watch for audio - https://youtu.be/3yHsG9FnWI8 

ఆతఁడే బ్రహ్మణ్యదైవము - Aatade Bramhanya Daivamu

ఆతఁడే బ్రహ్మణ్యదైవ మాదిమూలమైనవాఁడు
ఆతని మానుటలెల్లా నవిధిపూర్వకము

యెవ్వనిపేరఁ బిలుతు రిలఁ బుట్టినజీవుల
నవ్వుచు మాసనక్షత్రనామములను
అవ్వల నెవ్వనికేశవాదినామములే
రవ్వగా నాచమనాలు రచియింతురు

అచ్చ మేదేవుని నారాయణనామమే గతి
చచ్చేటివారికి సన్యాసమువారికి
ఇచ్చ నెవ్వరిఁ దలఁచి యిత్తురు పితాళ్లకు
ముచ్చట నెవ్వనినామములనే సంకల్పము

నారదుఁడు దలఁచేటి నామమది యెవ్వనిది
గౌరినుడిగేటి నామకథ యేడది
తారకమై బ్రహ్మరుద్రతతి కెవ్వరినామము
యీరీతి శ్రీవేంకటాద్రి నెవ్వఁడిచ్చీ వరము

Watch for audio - https://youtu.be/laPBTVgiP1w 

ఎదురేది యింక మాకు - EDUREDI INKA MAAKU

ఎదురేది యింక మాకు యెందు చూచినను నీ-
పదము లివి రెండు సంపదలు సౌఖ్యములు

గోపికానాథ గోవర్ధనధరా
శ్రీపుండరీకాక్ష జితమన్మథా
పాపహర సర్వేశ పరమపురుషాచ్యుతా
నీపాదములే మాకు నిధినిధానములు

పురుషోత్తమా హరీ భువనపరిపాలకా
కరిరాజవరద శ్రీకాంతాధిప
మురహరా సురవరా ముచుకుందరక్షకా
ధరణి నీపాదములె తల్లియును దండ్రి

దేవకీనందనా దేవేంద్రవందితా
కైవల్యనిలయ సంకర్షణాఖ్య
శ్రీవేంకటేశ్వరా జీవాంతరాత్మకా
కావ నీపాదములె గతి యిహముఁ బరము

Watch for audio - https://youtu.be/v6Yk_6CjylU 

హరి నిన్నుఁ పిలిచీని - Hari Ninnu Pilichini

హరి నిన్నుఁ బిలిచీని అదివో అమ్మా
తెరమఱఁ గిఁకనేల తియ్యవమ్మా

చిత్తరు పతిమవంటి చెలియా నీవు
యిత్తల పతికి విడె మియ్యవమ్మా
కొత్తమెఱుఁగుఁ బోలిన కోమలి
మొత్తమి కూరిమిపతిమోము చూడవమ్మా

బంగారుబొమ్మవంటి పడఁతి నీవు
అంగవించి పతితో మాఁటాడవమ్మా
అంగజు శరమువంటి అతివె నీకు
నంగతన మిది యాల నవ్వవమ్మా

చంచుల చిగురువంటి జవ్వని నీవు
కొంచక శ్రీవేంకటేశుఁ గూడితివమ్మా
మించుఁదమ్మిలోని యలమేలుమంగా
యెంచి యిద్దరును మమ్ము నేలరమ్మా 

Watch for audio - https://youtu.be/cpUdJ-slPaQ 

కలలోని సుఖమే - Kalaloni Sukhame

కలలోని సుఖమే కలియుగమా,వెన్న
కలిలో నెక్కడిదె కలియుగమా

కడిగడి గండమై కాలము గడపేవు
కడుగఁగడుగ రొంపి కలియుగమా
బడలికె వాపవు పరమేదో చూపవు
గడిచీటియును నీవు కలియుగమా

కరపేవు కఱతలే మఱపేవు మమతలే
కరకఱ విడువవు కలియుగమా
తెరచీర మఱఁగింతే తెరువేల మూసేవు
గరుసేల దాఁటేవో కలియుగమా

కానిదె మెచ్చేవు కపటాలే యిచ్చేవు
కానీలే కానీలే కలియుగమా
పైనిదే వేంకటపతి దాసులుండఁగ
కానవా నీ విదేమి కలియుగమా 

Watch for audio - https://youtu.be/RUjFSQ_RPzE 

పరమ వైష్ణవులభాగ్యం బిదివో - Parama Vaishnavula Bhagyambidivo

పరమవైష్ణవులభాగ్యం బిదివో
నిరతివారలకే నే మొక్కెదను

తలఁచ రొకప్పుడు ధరణి భోగములు
తలఁచ రితరమతదైవముల
తలఁతు రొకటి హరిదాసులదాస్యము
తలఁపు మోక్షములతగులమి(మె?) గాన

కోరరు బ్రహ్మదిగురుతరపదములు
కోరరు మేరువుకొనసుఖము
కోరుదురు తదియ్యకోట్ల సంగము
కోరిక భక్తితోఁ గూఁడీగాన

వొల్లరు కర్మము లొల్లరు పుణ్యము
లొల్లరహంకార మొకపరియు
వుల్లము శ్రీవేంకటోత్తము శరణని
యెల్లందుఁ దుదిపద మొక్కిరిగాన

Watch for audio -  https://youtu.be/vArrzimB5rA 

జ్ఞానయజ్ఞ మీగతి మోక్షసాధనము - Gnanayagna migathi MokshaSadhanamu

జ్ఞానయజ్ఞ మీగతి మోక్షసాధనము
నానార్థములు నిన్నే నడపె మాగురుఁడు

అలరి దేహమనేటి యాగశాలలోన
బలువై యజ్ఞానపు పశువును బంధించి
కలసి వైరాగ్యపుకత్తులఁ గోసి కోసి
వెలయ జ్ఞానాగ్నిలో వేలిచె మాగురుఁడు

మొక్కుచు వైష్ణవులనే మునిసభ గూడపెట్టి
చొక్కుచు శ్రీపాదతీర్థ సోమపానము నించి
చక్కఁగా సంకీర్తనసామగానమును చేసి
యిక్కువతో యజ్ఞము సేయించెఁబో మాగురుఁడు

తదీయగురుప్రసాదపు పురోడాశ మిచ్చి
కొద దీర ద్వయమనుకుండలంబులు వెట్టి
యెదలో శ్రీవేంకటేశు నిటు ప్రత్యక్షముచేసె
యిదివో స్వరూపదీక్ష యిచ్చెను మాగురుడు 

Watch for audio - https://youtu.be/gD1g5gqaFF0 

కొల్లున నవ్వేరు నిన్ను - Kolluna Navveru Ninnu

కొల్లున నవ్వేరు నిన్ను గోవిందుఁడా
గొల్లెతల నేమనేవు గోవిందుఁడా

యేపున నీసుద్దులెల్ల యిట్టె యశోదతోడ
గోపిక లాడుకొనేరు గోవిందుఁడా
తీపుల నీచేఁతలెల్ల తేట తెల్లమాయనిదే
కోపగించఁ జెల్లదిఁక గోవిందుఁడా

సిసువవై యాడువారి చీరలు దీసినందుకు
కొసరి తిట్టేరు నిన్ను గోవిందుఁడా
పసులఁగాచేచోట భామలు విందు దెచ్చిరి
కుసిగుంపు సేయకుమీ గోవిందుఁడా

వాడలసతుల నొక్కవావిగానే సేసితివి
కోడెల నావులఁ గాచేగోవిందుఁడా
యీడనే శ్రీవేంకటాద్రి నిరవై శ్రీ సతితోడఁ
గూడి లోలుఁడ వైతివి గోవిందుఁడా 

Watch for audio - https://youtu.be/4BZzquFbLSo 

ఇంకనైనఁ కరుణించవేమయ్య - Inkanaina Karuninchavayya

ఇంకనైనఁ గరుణించవేమయ్య శ్రీ-
వేంకటేశ మాఇంటికి విచ్చేయవయ్యా

చింతాజలధి దాఁటఁ జెక్కుచేయి తేపసేసి
కాంత నీ కెదురుచూచీఁ గదవయ్యా
కొంతపుఁ గోరికలనే కొండవాఁకఁ దనజడ
ఇంతలో నిచ్చనసేసీ నిది చూడవయ్యా

వెడ చింతచీఁకటికి వెలుగుగా నిట్టచూపు
కడఁగి పంజువట్టె రాఁగదవయ్య
అడరి తమకమనేఅడవి దాఁట నిట్టూర్పు
యెడ గుఱ్ఱముగఁ జేసి యెక్కె నిదె కోవయ్యా

మదనానలం బార్చ మంతనానఁ జెమటల
నదులు వరపి నిన్ను నవ్వెనయ్య
యిదివో శ్రీవేంకటేశ యింతలోఁ గూడగ నిన్ను
మదిరాక్షి నీపొందు మరవలేదయ్యా 

తాత్పర్య వివరణ:
ఓ శ్రీవేంకటేశ్వరా! నన్ను ఇంకమీదటైనా కరుణించవేమయ్యా? దయచేసి మా ఇంటికి విచ్చేయవయ్యా!
ఒక్కసారి నీ విరహమనే చింతాజలధిని దాటటానికి ఆదేవి తన చెక్కిలిపై చేర్చిన చేతినే తెప్పగా చేసినదయ్యా! ఆమె 'జడ' ఆమెను కల్లోలపరచుచున్న కోరికలనే పర్వతఝురిపై నిచ్చెనవలె సేసి, కాస్త నీ దృష్టిలో వుంచుకోవయ్యా!
ఆమె వెడ (తుచ్ఛమైన) చింత అనే చీకటికి వెలుగువలె నిట్టచూపు చక్కటి దివిటీ చేపట్టి ఆమెకు సాయము రారాదుటయ్యా? పాపం ఏమిచేయాలో తోచక ఆమె తమకము అనే అడవిని దాటటానికి తన సుదీర్ఘమైన నిట్టూర్పనే ఒక అశ్వమును చేసినది. ఎట్లాగో యెక్కి పయనిస్తున్నది. ఇదే ఆమెను యేలుకోవయ్యా!
స్వామీ నీకు తెలియందేముంది? నీ విరహమనే అనలమున (అగ్నిలలో) బడి ఆమె సతమతమగుచున్నది. మంతనాన (సమయస్ఫూర్తితో) దాన్ని ఆర్పుటకు తన చెమటలనే నదుల సహకారము ఆమె తీసికొనుచున్నది. అట్లు చేసి నేను జయించాను సుమా! అన్నట్లు చిరునవ్వు నవ్వుచున్నది. ఓ శ్రీవేంకటేశ్వరా! నీవు మాత్రం తక్కువవాడివా? ఆమెను మనస్సు పులకరించునట్లు కూడితివి. ఇక ఆ మధిరాక్షి (మదము కప్పిన కన్నులుగల స్త్రీ) నీ పొందు యెన్నడూ మరువలేదయ్యా.
(సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు)

Watch for audio - https://youtu.be/oodUX0LKv5o 

ఈతఁడు తారక బ్రహ్మమితఁడు - Itadu Taraka Bramhamitadu

ఈతఁడు తారకబ్రహ్మ మితఁడు మాదేవుఁడు
కౌతుకానఁ జెప్పే వినఁగదరే వో జనులు

రాముఁడు యిందీవరశ్యాముఁడు నానాసార్వ-
భౌముఁడు షోడశకళాసోముఁడు
దోమటిరాక్షసులను తుత్తుమురు సేసినాఁడు
కామితఫలములిచ్చి కాచినాఁడు సురల

పూర్ణుఁడు నీలమేఘవర్ణుఁడు దానమున వి-
స్తీర్ణుఁడు వాహనసువర్ణుఁడు
అర్ణవము దాఁటి రావణాదుల గెలిచినాఁడు
నిర్ణయించి చెప్పరాదు నేఁడీతని మహిమ

వరుఁడు సీతకు పరాత్పరుఁడు కోదండదీక్షా-
గురుఁడు దివ్యామోఘశరుఁ డితఁడు
నిరతి శ్రీవేంకటాద్రినెలవై యుండేటివాఁడు
సరి భరతలక్ష్మణశత్రుఘ్న సహితుఁడు

Watch for audio - https://youtu.be/d68qvCig71c 

రాతిరెల్ల సతులతో - Raatirella Sathulato

రాతిరెల్ల సతులతో రతుల నలసెనేమో
రీతిగాదు హరి నెచ్చరికెసేయరే

పైపైఁ బొద్దువొడచి పంకజములు విరిసె
గోపగోవిందుని మేలుకొనుమనరే
దీపములు దెల్లఁబారె తిమిరమింతయు జారె
శ్రీపురుషోత్తమునిఁ జేయంటి లెమ్మనరే

కలువలు ముకుళించీ కలవింక లెలుగించీ
నెలఁతలు దేవదేవు నిద్రదెల్పరే
జలనిధి పొంగణఁగె చాయల చుక్కలుమాసె
వలరాచగురు నుప్పవడముగమ్మనరే

జీవులు మేలుకొనిరి చెంగలించె దరువులు
భావించి యచ్యుతు నిట్టె పలికించరే
కావి రింతయు విరిసె కడుసంధ్యకు బొద్దాయ
శ్రీవేంకటేశుని విచ్చేయుమనరే 

Watch for audio - https://youtu.be/KzWkIFObgD8 

ముద్దులుగారీ మోమునను - Muddulu Gari Momunanu

ముద్దులుగారీ మోమునను
వొద్దిక నేమైన నొసగరె చెలులు

చెక్కులవెంటాఁ జెమటలు గారీ
యెక్కడ నాడెనొ యిందాఁకా
చక్కఁ గృష్ణునికి జలకము సేయరె
నెక్కొని కాఁగిట నించరె చెలులు

పొరిఁబొరి నిట్టూర్పులు గడురేఁగెను
పరువులు వెట్టెనొ పడుచులతో
సరుగన శైత్యోపచారము సేయరె
యిరవుగ నుయ్యల నిడరే చెలులు

చుట్టుకొన్నజడ చొల్లెము జారెను
వుట్టులు గొట్టెనొ వుదుటునను
పట్టి యలమేల్మంగపతి శ్రీవేంకటేశుఁ-
డిట్టిపనులవా రెంచరె చెలులు 

Watch for audio - https://youtu.be/L3Gp33kXNfI