ఎవ్వరము నేమిసేసేము - Evvaramu Nemisesemu

ఎవ్వరము నేమిసేసే మేమిగడమలు నీకు
రవ్వగా శరణంటే రక్షించుటింతే

అందరుఁ జేసినకర్మము లవి నీకు జీవనమై
అంది జీవించేవంటే నదియూఁ గాదు
కొందరు సురల(లు?)తోడై కూడిరాఁగా నసురల-
యిందరి గెలిచేవంటే నిదియూఁ గాదు

వొకచోటఁ గలవు వేరొకచోట లేవంటే-
నకటా యెంచిచూచిన నదియూఁ గాదు
మొకమిచ్చి వొకగుణమునఁ దిరిగేవంటే
సకలగుణుఁడ వాజాడయుఁ గాదు

కపట మిదనరాదు కడునవుననరాదు
వుపమించరాదు వొల్లకుండఁగరాదు
యెపుడును శ్రీవేంకటేశ నీ చిత్తమింతే
విపరీతములు లేవు వెలితీ లేదు

Watch for audio - https://youtu.be/58t0QdqGALE 

ఎచ్చటఁ జూచిన నితఁడై - Yacheta Chucina Nithadai

ఎచ్చటఁ జూచిన నితఁడై కృష్ణుడు
మచ్చిక నలమేలుమంగతో వెలసీ

కొట్టరో వుట్టులు గోపాలబాలులు
యిట్టె కృష్ణుని యెదుటను
పట్టరో వారలు పాలు నేతికిని
గట్టిగ జోరునఁ గారీ నవిగో

కూడరో మూఁకలు కోలలవారలు
వేడుకఁ గృష్ణుని వెంటవెంట
ఆడుచు మెసఁగరొ అడుఁకులుఁ జక్కిలాలు
వాడల వాడల వరుసతోను

నిక్కి తీసుకోరో నెఱవాదికాండ్లు
మక్కువఁ గృష్ణుని మఱఁగునను
యెక్కరో శ్రీవేంకటేశు కొండమీఁద
పెక్కు నురుగులు పెరుగులు నివిగో

Watch for audio - https://youtu.be/mePYRgZD8ns 

విష్ణుఁడే యింతానని - Vishnude Inthanani

విష్ణుఁడే యింతానని భావించుటే బుద్ధి
వైష్ణవుఁడై యాచార్యసేవ సేయుటే బుద్ధి

కొండవంటి తనలోని కోపము రేఁగవచ్చితే
దండనే యెచ్చరి వూరకుండుటే బుద్ధి
మెండుగా బరకాంతలమీఁదతమి వుట్టితేను
అండుకాచందుకు భ్రమయకుండుటే బుద్ధి

అట్టె యెవ్వరయినా గృహారామాదులపై నాస
పుట్టించితేఁ వానివెంటఁ బోనిదే బుద్ధి
చుట్టపు సమ్మంధాన సోఁకితే పరబాధలు
చుట్టుకోక లోనుగాక జునుఁగుటే బుద్ధి

తప్పదింతా దైవికమే తనవద్దనున్నవారిఁ
దప్పులు పట్టనిదే తగిన బుద్ధి
యెప్పుడూ శ్రీవేంకటేశుఁ డెదలోన నున్నవాఁడు
చొప్పెత్తి యాతనిమూర్తి చూచుటే బుద్ధి 

భావవివరముః
అన్నమయ్య చెప్పిన ఈ కీర్తనలో బుద్ధి అంటే సద్బుద్ధి అని అర్థం చేసుకోవాలి. సద్బుద్ధి అని దేనినంటారో వివరిస్తున్నారు. అంతా విష్ణుమాయయేనని భావించుటే బుద్ధి. వైష్ణవమును స్వీకరించి నీ ఆచార్యుని సేవచేయుటయే బుద్ధి, అని అంటున్నారు. తనలో కొండంత కోపమున్నా దానినణచివైచి హెచ్చరికతో మౌనంగా వూరకుండుటే బుద్ధి అనబడును. పరకాంతలమీద వ్యామోహ పడకుండా వారిపై కలిగిన భ్రమలకు లోనుగాక నిగూఢముగా వుండుటే బుద్ధి. ఎవ్వరైనా గృహములు ఆరామములు ఇస్తామని ఆశపుట్టిస్తే వారివెంట పడిపోకుండుటే బుద్ధి అనబడును. చుట్టరికములు సంబంధములు కలిసినప్పుడు పరుల వలన అనేక బాధలు కలుగుతాయి. మనము వాటికి లోనుయై పోతుంటాము. వాటిని తప్పించుకొని సుఖముగా వుండుటయే బుద్ధి అనబడును. మనకు చెడుజరిగినా అది దైవికము తప్పించుకొనుట అసాధ్యమని నమ్మి తనవద్దనున్న వారిని దోషులని తప్పు పట్టకవుంటేనే బుద్ధి. శ్రీవేంకటేశ్వరుడు తిరుమల శిఖరాలమీద మాత్రమే కాదు, మన హృదయంలోనే వుంటాడని గ్రహించి ఆయన దారిని పట్టుకొని ఆయన మూర్తిని దర్శించుటే బుద్ధి అనబడుతుంది.
* * జునుగుట - తప్పించుకొనుట 
** చొప్పెత్తి - దారిని పట్టుకొని 
(సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు)

Watch for audio - https://youtu.be/vbWPhBuJ-Qs

దైవమా నీపెరరేఁపణ - Daivamaa Neeperarepana

దైవమా నీపెరరేఁపణ లివి తప్పక వున్నవి జీవులకు
భావించి కాదనిదొబ్బి దీకొనఁగ బ్రహ్మాదులకైనను వసమా

యెక్కడ సిద్ధించు బ్రహ్మచర్యము యెదుటనే కాంతలఁ జూచినవేళను
చక్కఁగా మనోవ్యభిచారంబునఁ జలియించుం గాక
చిక్కునే విరతి ధనధాన్యంబులు చేతికి లోనయినఁ జూచి
వొక్కటియై తా నండే మగ్నమునొందించుం గాక

కలుగునే తనివి బహుపదార్థములు గక్కన నంగళ్లనుఁ జూచి
కొలఁదిమీఱఁ గడుతరితీపులతో కోరుచు నోరూరుం గాక
వలనుగ సమాధి యెటువలె దొరకొను వాజవారణంబులఁ జూచి
యెలమితోడ ముంగిళ్లనెల్లఁ జరియింపించుఁ గాక

యేరీతి నెలకొను నీమీఁదితలఁపు యిహలోకపుసౌఖ్యము చూచి
భారపులంపటములు పై దగిలించి పనులకుఁ బురికొలుపుఁ గాక
ధారుణి నే నివి గెలుచుట యెన్నఁడు తగ శ్రీవేంకటనాయక నీవే
గారవించి రక్షింపుము నీ కిది కడునుపకారంబౌఁ గాక

Watch for audio - https://youtu.be/Tx3cYTqWdus

నారాయణుఁ డీతఁడు - Narayanuditadu

నారాయణుఁ డీతఁడు నరులాల
మీరు శరణనరో మిమ్ముఁ గాచీని

తలఁచిన చోటను తానే వున్నాఁడు
వలెననువారి కైవసమెపుడు
కొలచెను మూఁడడుగుల జగమెల్లాను
కొలిచినవారిఁ జేకొనకుండునా

యెక్కడఁ బిలిచినా నేమని పలికి
మొక్కిన మన్నించు మునుముగను
రక్కసుల నణఁచి రక్షించు జగములు
దిక్కని నమ్మినఁ దిరముగా నేలఁడా

చూచినయందెల్ల చూపును రూపము
వోచికఁ బొగడిన వుండు నోటను
యేచిన శ్రీవేంకటేశుఁడే యితఁడట
చేచేతఁ బూజింప సేవలు గొనఁడా

Watch for audio - https://youtu.be/QUyou1N9TI4