అన్నియు నాయందే - Anniyu Nayandhe

అన్నియు నాయందే కంటి నన్నిటివాఁడా నేనే
మున్నె నా భావముతో ముడిచివేసినది

చెలఁగి సంసారమే చింతించి సంసారినైతి
ములిగి ముక్తిదలఁచి ముక్తుఁడనైతి
పలుమతాలు దలఁచి పాషండబుద్ధినైతి
చెలఁగి శ్రీపతిఁ దలఁచి వైష్ణవుఁడనైతి

పొసఁగఁ బుణ్యముసేసి పుణ్యాత్ముఁడనైతి
పసలఁ బాపముచేసి పాపకర్ముఁడనైతి
వెస బ్రహ్మచారినైతి వేరె యాచారమున
ముసిపి మరొకాచారమున సన్యాసినైతి

వొగి నొడ్డెభాషలాఁడి వొడ్డెవాఁడనైతిని
తెగి తెలుఁగాడ నేర్చి తెలుఁగువాడనైతి
అగడై శ్రీవేంకటేశ అన్నియు విడిచి నేను
తగు నీదాఁసుడనై దాసరి నేనైతి

Watch for audio - https://youtu.be/S8dH4ZIRLTw 

ఎటువంటిరౌద్రమో - Etuvanti Roudramo

ఎటువంటిరౌద్రమో యెటువంటికోపమో
తటతట నిరువంక దాఁటీ వీఁడే

తోరంపుఁ బెనుచేతుల మల్లచఱచి
దారుణలీలఁ బెదవు లవుడుకఱచి
కారించి చాణూరుఁ గడుభంగపఱచి
వీరుఁడై యెముకలు విఱచీ వీఁడే

పిడుగడచినయట్టు పెడచేత నడిచి -
పడనీక పురములోపలఁ జొరఁబొడిచి
తొడికి చాణూరు నెత్తుక దయవిడిచి
వడివెట్టి నెత్తురు వడిచీ వీఁడే

బుసకొట్టుచును వూరుపులఁ జెమరించి
మసిగాఁగ బెదపెదమల్లుల దంచీ-
నెసఁగి శ్రీతిరువేంకటేశుఁడై మించి
ముసిముసినవ్వుల ముంచీ వీఁడే

Watch for audio - https://youtu.be/e8OHsogMQ9s 

అంతటిదైవమ - Antati Daivama

అంతటిదైవమ వటుగాఁగా
చెంత నిన్నుఁ గూర్చినదే ఘనము

వెరవునఁ బంచమ వేదసారములు
సిరుల నినునుతించిననుతులు
సరవితోడి బహుశాస్త్రసంతతులు
నిరతిఁ జెప్పెడిని నీకథలు

కొంగుపైడియగు గురుమంత్రంబులు
సంగడి వైష్ణవసంభాషలు
నింగికి భూమికి నిజపురాణములు
సంగతిగల నీసంకీర్తనలు

వూనినవిధుల మహోపనిషత్తులు
నానాగతి నీనామములు
వీనులకును శ్రీవేంకటేశ మీ-
జ్ఞానార్థములు మిముఁ జదువుచదువులు

Watch for audio - https://youtu.be/9F3q9sO4UsA 

రామచంద్రా రామభద్రా - Ramachandra Ramabhadra

రామచంద్రా రామభద్రా రఘువీరా
నీ మహిమ దెలిసేరా నేఁటి వారు

అరయ జటాయువున కట్టె మోక్ష మిచ్చితివి
హరునివిల్లు విరిచి అలరితివి
యిరవై రాతికిఁ బ్రాణ మిచ్చితి వింతటి నిన్ను
నరుఁ డంటా నుండిరిగా నాఁటి వారు

నెమ్మది సరయువులో నించితి వైకుంఠము
పమ్మి మారుతికి బ్రహ్మపట్ట మిచ్చితివి
దుమ్ములుగ రాక్షసులఁ దుత్తుమురు సేసితివి
నమ్మిరిగా రాజవంటా నాఁటివారు

యెందునుఁ జెడని పట్ట మిచ్చితి విబీషణుని
కంది పరశురాముని నంగవించితి
యిందునే శ్రీ వేంకటేశ యెఱుఁగక దశరథ
నందనుఁడే యనిరిగా నాఁటివారు

Watch for audio -  https://youtu.be/j39v_IDQ1hc 

సిగ్గరి పెండ్లికూఁతుర సీతమ్మ – Siggari Pendikutura

సిగ్గరి పెండ్లికూఁతుర సీతమ్మ 
దగ్గరి సింగారబొమ్మ  తలవంచకమ్మా 

అల్లనాఁడే  రాఘవుఁడు హరువిల్లు విరిచెను 
యెల్లి నేడే  పెండ్లాడీ  నిదివో నిన్ను 
యెల్లగా జనకుఁడు నిన్నిచ్చీనట వీఁడె 
వెల్లవిరి నీమాట వినవమ్మా 

అదె పెండ్లితెర  యెత్తి రండనే  వసిష్టు డుండి 
చదివీ మంత్రాలు సేస చల్లవమ్మా 
మొదల రామునికంటె ముంచి తలఁబాలు వోసి  
సుదతి యాతనిమోము  చూడవమ్మా 

కంకణదారాలు గట్టి కాలుదొక్కితివి మీరు 
పొంకాన బువ్వ మందరో  పొత్తుల నమ్మ 
వుంకువ వావిలిపాట నుండి శ్రీవేంకటగిరి 
తెంకుల నిన్నుఁ గూడి తిరుమాయనమ్మా

Watch for audio - https://youtu.be/u6Lf_BUIgD0 

వినుఁడిదె రఘుపతి - Vinudide Raghupati

వినుఁ డిదె రఘుపతి విజయములు
పనుపడి రాక్షసబాధ లుడిగెను

కులగిరు లదరెను కుంభిని వడఁకెను
యిల రాముఁడు రథమెక్కినను
కలఁగె వారిధులు కంపించె జగములు
బలువిలునమ్ములు వట్టినను

పిడుగులు దొరిగెను పెనుగాలి విసరె
తొడిఁబడి బాణము దొడిగినను
ముడివడె దిక్కులు మొగ్గె దిగ్గజములు
యెడపక రావణు నేసినను

చుక్కలు డుల్లెను స్రుక్కె భూతములు
తొక్కి యసురతల దుంచినను
గక్కన శ్రీవేంకటగిరి నిలువఁగ
అక్కజమగు శుభ మందరికొదవె

Watch for audio - https://youtu.be/HQE23QER00I 

వేఁకునఁ దిరుపళచ్చి - Veikuna Dirupalachi

వేఁకునఁ దిరుపళచ్చి విష్ణునికిఁ జేయరో
ఆఁకటికొదగినట్టి ఆరగింపులు

అతి బ్రహ్మాండాలు గుక్షి నటు ధరించినయట్టి-
అతనికిఁ జేయరో ఆరగింపులు
ప్రతిలేని క్షీరాబ్ధిఁ బవళించి లేచినట్టి-
చతురునికిఁ జేయరో చవి నారగింపులు

యేడుదినములదాఁకా నెత్తెను గోవర్ధనము
ఆడివచ్చే బాలునికి నారగింపులు
మేడెపు గోపికలతో మిక్కిలిఁ బెనఁగినట్టి-
వేడుకకానికిఁ దేరో విందు లారగింపులు

పట్టపుదేవుళ్లుఁ దాను బంతి సాగి వున్నవాఁడు
అట్టె సేయరో పులుఁగ మారగింపులు
నెట్టన శ్రీవేంకటాద్రినిలయుఁ డారగించీని
మట్టులేక వడ్డించరో మంచి యారగింపులు

Watch for audio - https://youtu.be/Pyv8_4mgrCQ 

ఏమి నోము నోచినదో - Emi Nomu nochinadho

ఏమి నోము నోచినదో యీయింతి
కామించి కన్నులారఁ గంటిమి మీపొందులు

చిత్తగించి నిన్నుఁజూచి సిగ్గువడీ నిదివో
కొత్తపెండ్లి కూఁతురు యీకొమ్మగాఁబోలు
మొత్తమి నీమాట విని ముసిముసినవ్వు నవ్వీ
జొత్తైనతొల్లిటినీచుట్టముగాఁ బోలును

అగపడి సరసములాడితే సమ్మతించీని
తగిన నీమేనమఱఁదలు గాఁబోలు
పగటున నీవుగప్పేపచ్చడము గప్పుకొనీ
జగమెఱఁగఁగ నీకు చనవరి గాఁబోలు

వొనరఁ బానుపుమీఁద నుండి నీపాదములొత్తీ
యెనసి వూడిగమాపె యీకె గాఁబోలు
నను నేలితివి ముందే నంటున శ్రీవేంకటేశ
నిన్నుఁ జెనకీఁ దానూ నేస్తము గాఁబోలు

Watch for audio - https://youtu.be/E_9GxEMxjrg 

అదివో లకిమమ్మ - Adivo Lakimamma

అదివో లకిమమ్మ అహోబలేశ్వరుతోడ
పదివేలు చందముల పరగీ రతులను

సరుసనే కూచుండి జవళిఁ గొండలమీఁద
యిరులు చల్లులాడీ విభుఁడుఁదాను
పరిపరివిధముల భవనాశి దరులను
సరసములాడీని సాటికి చేటికిని

యెదురుఁగాఁగిళ్ళతోడ నెనసి మాఁకులనీడ
పెదవితేనె లానీని ప్రేమమునను
నిదినిధానాలవలె నిచ్చ వానపడలను
సదమదమై నవ్వీని చతురత మెఱసి

తొడఁదొడఁ గదియఁగ దోమటి గద్దెల నుండి
జడియక పెనఁగీని సమరతిని
యెడయక శ్రీవేంకటేశుఁడే నరసింహుఁడై
అడరఁగఁ బెండ్లాడీ నతి సంతోసమున

Watch for audio - https://youtu.be/-GiCoi-AxiM 

మునుల తపము - Munula Tapamu

మునుల తపము నదె మూలభూతి యదె
వనజాక్షుఁడే గతి వలసినను

నరహరి నామము నాలుక నుండఁగ
పర మొకరి నడుగఁబని యేల
చిరపుణ్యము నదె జీవరక్ష యదె
సరుగఁ గాచు నొకసారె నుడిగినా

మనసులోననే మాధవుఁ డుండఁగ
వెనుకొని యొకచో వెదకఁగనేఁటికి
కొనకుఁగొన యదే కోరెడి దదియే
తనుఁ దా రక్షించుఁ దలఁచినను

శ్రీవేంకటపతి చేరువ నుండఁగ
భావకర్మముల భ్రమయఁగనేఁటికి
దేవుఁడు నతఁడే తెరువూ నదియే
కావలెనంటేఁ గావకపోఁడు 

Watch for audio - https://youtu.be/TdG9B1IRMC8 

లంకెలూడుటే లాభము - Lankeludute Labhamu

లంకెలూడుటే లాభము యీ-
కింకరులను నలఁగెడికంటెను

జంపులఁ జంపక సరుగనఁబాసేటి-
లంపటమేపో లాభము
కంపుమోపుతోఁ గనలి శరీరపు-
కొంపలోన వేఁగుట కంటెను

యీవలనావల నేచేటి యాసల-
లావు దిగుటెపో లాభము
యేవగింతలకు నిరవగు నరకపు-
కోవులఁబడి మునుఁగుటకంటెను

తివిరి వేంకటాధిపుదాసులకృప-
లవలేశమెపో లాభము
చవులని నోరికి సకలము దిని తిని
భవకూపంబులఁ బడుకంటెను

Watch for audio - https://youtu.be/A2bPQcbNPwk 

ఎందు నీకు ప్రియమో - Yenduneeku Priyamo

ఎందు నీకు బ్రియమో యీ తెప్పతిరుణాళ్ళు
దిందువడె సిరులతో యీ తెప్పతిరుణాళ్ళు

పాలజలనిధిలోఁ బవ్వళించీ పాముతెప్పఁ
దేలుచున్న దది దెప్పదిరుణాళ్ళు
వోలి నేకోదకమై వొక్క మఱ్ఱియాకుమీఁద
తేలుచున్నదది యీ తెప్పతిరుణాళ్ళు

అమృతము దచ్చునాఁడు అంబుధిలో మంధరము
తెమలఁ దేలించు యీ తెప్పతిరుణాళ్ళు
యమునలో కాళింగునంగపుపడిగెమీఁద
తిమిరి తొక్కిన యీ తెప్పతిరుణాళ్ళు

అప్పుడు పదారువేలు అంగనల చెమటల-
తెప్పలఁ దేలిన తెప్పతిరుణాళ్ళు
వొప్పుగ శ్రీవేంకటాద్రి నున్నతిఁ గోనేటిలోన
తెప్పిరిల్లె నేఁటనేఁట యీ తెప్పతిరుణాళ్ళు

Watch for audio - https://youtu.be/dZDtWkH6cwQ 

చిత్తగించి చూడవయ్య - Cittaginchi Chudavayya

చిత్తగించి చూడవయ్య చెలిలాగు
బిత్తరపుజవ్వనము పెచ్చుపెరిగీని

చెలివీనులజవ్వాది చెక్కులఁ గరఁగి జారీ
వెలి నిన్నుఁ బాసినవిరహానను
మలసినకోరికలు మతిలోఁ దీఁ గెలువారీ
వలపుల చెమటలవానలను

వేవేగఁ బెట్టినకొప్పు వెడజారీ మూఁపుమీఁద
నీవొద్దికి వచ్చేటి నిబ్బరానను
పూవుల దండలో నిపుప్పొడి దుమ్ములురేఁగీ
కావరపునిట్టూర్పుల గాలిచేతను

మునుకొని మొరసీని ముంజేతికంకణములు
తనివార నిన్నుఁ గూడేతమకమున
యెనసితివి శ్రీవేంకటేశ యింతలోనె యీకెను
వినయాన నీకు మొక్కీ వేడుకలను

Watch for audio - https://youtu.be/j3JDKfuZIMA 

ఆకాశపాకాశ మాయెఁ - Akashapakasha Maye

ఆకాశపాకాశ మాయెఁ గోమలినడుము
వైకుంఠపతిపొందు వడిఁ దెలుపుకొఱకు

పరగఁ గెమ్మోవిపై పగలు చుక్కలు వొడిచె
పరివేషమృగనాభిఁ బరగె మోము
మరునిసమరమునఁ గోమలి విభునితోఁ జెనకు
సరసతల కిదియ సూచన చంద మాయె

ఎలమి బొమ్మలజంకె లింద్రధనువులు వొడిచె
మొలచెఁ గన్నులఁగావి మొయిలు ఘనమై
కొలఁది కగ్గలపుఁగుంకుమచెమట నెత్తురులు
పొలఁతిపైఁ గురియుటకుఁ బోటివలె నాయె

అంగనకునెడమతొడ అదరి భూకంపంబు
సంగతి వహించెఁ జంచలము లేక
ఇంగితంబుగ వేంకటేశుఁ గూడినపొందు
కొంగుబంగారమై కోరికలు మీఱె 

Watch for audio - https://youtu.be/Jg2VeWZcJm0 

ఎంత చదివిన నేమివినిన - Enta Chadivina Nemivinina

ఎంత చదివిన నేమివినిన తన-
చింత యేల మాను సిరులేల కలుగు

ఇతర దూషణములు యెడసినఁగాక
అతికాముకుఁడుగాని యప్పుడు గాక
మతిచంచలము గొంత మానినఁగాక
గతి యేల కలుగు దుర్గతులేల మాను

పరధనములయాస పాసినఁగాక
అరిదినిందలులేనియప్పుడు గాక
విరసవర్తనము విడిచినఁగాక
పరమేల కలుగు నాపదలేల మాను

వేంకటపతి నాత్మ వెదకినఁగాక
కింక మనసునఁ దొలఁగినఁగాక
బొంకుమాట లెడసిపోయినఁగాక
శంకయేల మాను జయమేల కలుగు

భావము - 
( శ్రీ తాడేపల్లి పతంజలి గారు)
చదివినంత మాత్రాన, విన్నంత మాత్రాన అది కావాలి - ఇది కావాలి అనే నీ చింత పోదు. నీకు భగవద్గీతలో చెప్పిన దైవీసంపద రాదు..
1. ముందు నీ ప్రవర్తనలో మార్పు తెచ్చుకో, ఇతరులతో దూషణ వాక్యాలు మానేయ్! కోరిక ఉండటంలో తప్పులేదు. అతి కోరికలు వదిలేయ్! చంచలత్వం ఆలోచనల్లో కొంతయినా వదలటానికి ప్రయత్నించు. అలా నీ ప్రవర్తనని మార్చుకోపోతే నీకు అతీగతీ లేదు. నీ బతుకంతా నరకమే (దుర్గతి).
2. ఇతరుల ధనం మీద ఆశ పడకు, భరించటానికి వీల్లేని (అరిది) నిందలు ఇతరుల మీద వేయకు. ఆవిధంగా నీ నడత ఉండకూడదు. ఎప్పుడూ తగాదాలాడే మనస్తత్వం వదిలేయ్! ఈ విధంగా ఉండకపోయావో నీకు మోక్షం రాదు. ఆపదలు పోవు.
3. శ్రీవేంకటేశ్వరుడిని ఆత్మలో తెలుసుకో! కోపాన్ని మనస్సులో పోగొట్టుకో, అబద్ధాలాడటం మానేయ్! ఇలా చేయకపోయావో నీకు జన్మ జన్మలనుంచి వస్తున్న సందేహాలు తొలగిపోవు. జయం కలగదు.

Watch for audio - https://youtu.be/aZ1fn8LWh9k 

వింతనా నేఁ దనకు - Vintha Nadanaku

వింతనా నేఁ దనకు వేసాలవాఁడు
కంతునికి గురుఁ డనగలిగినవాఁడు

జడిగొని మొదలఁ దా జలసూత్రపువాఁడు
వెడమాయలుగ బారి విద్యలవాఁడు
కడుసోద్యములనే కర్మపుఁ జేఁతలవాఁడు
అడరి కంభపుసూత్ర మాడెడివాఁడు

యిలనుండి మిన్ను ముట్టే యింద్రజాలములవాఁడు
తల ద్రుంచి బ్రదికించుతక్కులవాఁడు
తెలియఁ గొండలు నీళ్ళఁ దేలవేసినవాఁడు
కలసి పగలు రేయిగాఁ జేసేవాఁడు

మగువల భ్రమయించే మౌనవ్రతములవాఁడు
వెగటై రాయి గంతులు వేయించేవాఁడు
చిగిరించే వరముల శ్రీ వేంకటాద్రివాఁడు
బగివాయ కిట మమ్ముఁ బాలించేవాఁడు

Watch for audio - https://youtu.be/iNogQd6cfl0