పాపము చేరువ - Papamu Cheruva

పాపము చేరువ ప్రాణునికి
యేపునఁ బుణ్యం బేదోకాని

ముక్కున నున్నది ముంగోపం బిది
యెక్కువ శాంతం బిందున్నదో
చిక్కని యాసలు చేతిలో నున్నవి
గక్కున విరతే కానము గాని

కన్నుల నున్నది కామాంధకారము
యెన్నిక విజ్ఞాన మెందున్నదో
వున్నది నాలుక నూరక దైన్యము
యిన్నిట ధైర్యం బెఱుఁగము గాని

అవిగో తనువున ననాచారములు
యివల సద్ధర్మం బెందున్నదో
వివరి మొసఁగి శ్రీవేంకటేశ నా
భవ మీడేర్చఁగ బ్రదికితిఁ గాని

భావ దర్పణము :
పెదతిరుమలయ్య ఈ అధ్యాత్మ కీర్తనలో మానవులు చేసే పాపపుణ్యాలమధ్య పెద్ద దూరమువున్నదో లేదో? పుణ్యమేమిటో? సద్ధర్మంబెందున్నదో? ఈ దైన్యం పోయి ధైర్యం యెప్పుడొస్తుందో? ప్రాణులకి పాపము ఇంత చేరువ అవుతుంటే మరి 'పుణ్యము' అనిదేనినంటారు? చెడుచేరువైనంతగా మంచి యెందుకు చేరువ కాదంటున్నారు. మనకు విపరీతమైన “కోపము” ముక్కుననే వుంటున్నదే!! మరి యెక్కువ శాంతము యెందున్నదో కదా! మనకు స్వాధీనముకాని ఆసలు మనచేతిలోనే వున్నవి. కాని నిర్మోహము (విముఖత్వము) మాత్రం దరిదాపులో కనుపించుటలేదు. కామముతో కళ్ళుకప్పివేయబడినవంటారే అది నా కనులముందే వున్నది. కాని యెన్నికైన విజ్ఞానము, ఆత్మజ్ఞానము యెందున్నదో తెలియవచ్చుటలేదు. నా నాలుక దైన్యంతో పరులను యాచిస్తుంటుంది. పిఱికి మాటలు మాట్లాడుతుంది. దీనికి ధైర్యమంటే యేమిటో యెలా వుంటుందో తెలియదు కానీ... యేమి దౌర్భాగ్యం!! అదిగో ఈ నా తనువు నిండా అనాచారమే. మరి ఇక్కడ సద్ధర్మంబెందున్నదో తెలియవచ్చుటలేదు. అటువంటి దుస్థితిలో శ్రీవేంకటేశ్వరుడు నాపై కృపతో నా పుట్టుకను యీడేర్చినాడు. అందువలన బ్రదికి బట్టకట్టగలిగినాము.
* వివరము - వ్యాఖ్యానము
*ముంగోపము - ఓర్పులేక తటాలున వచ్చే కోపము 
(సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు) 

Watch for audio - https://youtu.be/C10Q7LyQEPg