ఒఱపో మెఱుపో వొయ్యారమో - Orapo Merupo Vayyaramo

ఒఱపో మెఱుపో వొయ్యారమో నీకు
వెఱతుమయ్య గోవిందుఁడా

కపటమో నిజమో కరుణయొ కోపమో
వుపచారమో వుపతాపమో
నిపుణత తనపై నెయ్యమే సేసేవు
విపరీతము గోవిందుఁడా

ననుపో నగవో నయమో ప్రియమో
చనవో చలమో సరసమో
కనుకూరిమియో గయ్యాళితనమొ
వెనుతగిలేవు గోవిందుఁడా

మంకో మరులో మదమో ముదమో
జంకో లంకో జగడమో
శంకలేక నను సరుగనఁ గూడితి
వేంకటగిరి గోవిందుఁడా 

తాత్పర్య వివరణ:
ఓ గోవిందుడా! మాకేమి తెలియుటలేదు. నీ దివ్యసౌందర్యము, నీమేని ప్రకాశము వర్ణించనలవికానిది. నీ ఒయ్యారమును యెంత చూచినా తనివి తీరుటలేదు. అప్పుడప్పుడు నీవంటే భయంకూడా కలుగుతుంటుంది.
నిన్ను చూచి మేమేమీ నిశ్చయం చేసికోలేకపోతున్నాము. నీవు కపటివో, నీ ప్రవర్తన నిజమైనదో, నీవు కరుణాంతరంగుడవో కోపిష్టివో, నీవు మాకు చేసేది ఉపచారమో, నెయ్యమో తెలియుటలేదు. ఈ విధంగా లెక్కించలేని భావాలు కలుగుతున్నాయి.
ఓ గోవిందుడా! నీవు వద్దన్నా మావెంటబడతావు. అది ననుపో (నీకు మాపైన అనురాగమో, (నవ్వులాటయో) నయమో (అనుకూలతయో) ప్రియమో (ప్రేమో) చనువో లేక ప్రణయతాపమో తెలియుట లేదు. నీవు నాపై చూపిస్తున్నదంతా కూరిమియో గయ్యాళితనమో తెలియుటలేదు. కృష్ణా! వద్దన్నా నా వెనుతగిలేవు (వెంటపడతావయ్యా!) గోవిందుడా!
నీ ఆలోచనలనర్ధం చేసుకోలేకపోతున్నాను. నీది మంకుతనమో మరులో (వలపులో) మదమో (గర్వమో) సంతోషమో, జంకో (భయమో) లంకో (సంకోచమో) తెలియుటలేదు. ఓ శ్రీవేంకటేశ్వరా! నీవు శంక అనునది లేక నన్ను కూడితివి. నీవు వేంకటగిరి గోవిందుడవు ప్రభూ!
(సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు)

Watch for audio - https://youtu.be/WnWVcnsJkYQ