హరి నీయనుమతో - Hari Ni Yanumatho

హరి నీయనుమతో అది నాకర్మమో
పరమే యిహమై భ్రమయించీని

కలుగదు శాంతము కటకట బుద్ధికి
చలమున నింతాఁ జదివినను
నిలువదు చిత్తము నీపై చింతకు
పలుసంపదలను బరగినను

తగులదు వైరాగ్యధన మాత్మకును
వొగి నుపవాసము లుండినను
అగపడదు ముక్తి ఆసలనాసల
జగమింతా సంచరించినను

విడువదు జన్మము వివేకముననే
జడిసి స్వతంత్రము జరపినను
యెడయక శ్రీవేంకటేశ్వర నీవే
బడిఁగాచితి విదె బ్రదికితి నేను

భావవివరముః
అన్నమయ్య యేమని వాపోతున్నారో ఆలకించండి. ఓ శ్రీహరీ! శాంతి లభించుటలేదు. మొండిపట్టుదల పోవటం లేదు. వైరాగ్యం వెలయుట లేదు. ముక్తి మార్గం అడియాసే అయింది. మరి ఇదంతా నీ అనుమతితోనే జరుగుతున్నదా? లేక నా కర్మమా? పరము అనేది లేనే లేదేమో!! ఇహమే పరమనే భ్రమ కలుగుతోంది అంటున్నారు. కటకటా! (అయ్యయ్యో) ఈ నాబుద్ధికి యెన్నటికి శాంతి కలుగదు. ఇంత చదివినా పంతము వదలుట లేదు. చిత్తమునీపై నిలుచుట లేదు. అనేక సంపదలు అంది వచ్చినను. అది నీ ప్రసాదముగా గ్రహించలేకపోతున్నాను. ఇదిట్లా వుండగా ఆత్మలో వైరాగ్య ధనం తగులుట లేదు. పేరుకి వుపవాసదీక్షలు చేస్తున్నాను. కాని వాటి వలన ఫలితం శూన్యం. ఎన్ని తీర్థయాత్రలు చేసినా ముక్తి మార్గం కనుపించుట లేదు. అది "ఆశ"గానే మిగిలిపోయింది. పోనీ ఆత్మవిచారము అలవరచుకొని స్వతంత్రముగా జీవన్ముక్తి పొందాలని ప్రయత్నిస్తే ఈ జన్మము నన్ను విడువదు. అన్నీ ఆలోచనలేగాని ఆచరణ ఆమడదూరం అన్నట్లు వున్నది నా పరిస్థితి. ఓ శ్రీవేంకటేశ్వరా! నీవే నన్ను విడువక నాపై దయగొని కాచితివి. ఇందువలన నేను బ్రతికిపోయాను. 
(సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు)
* జడిసి - ప్రకటించి  *తగులదు పట్టుకొనదు

Watch for audio - https://youtu.be/4KWuDBaAGlI