ఏల వూరకున్నాఁడవో - Ela Vurukunnadavo

ఏల వూరకున్నాఁడవో యెఱఁగము నేము నిన్ను
చాలా నమ్మి శరణంటే సమకూడరాదా

ఱాలు గరఁగించు నీఱట్టడిపాదము
కాలుచాఁచి సతులఁ గరఁగించు టరుదా
కీలించి మిన్ను నేల దొంగిలిన నీ చేయి
తాలిమి సతులమతి దక్కఁగొనలేదా

మాఁకులలోనైనా నుండి మాటలాడే నీనోరు
కాఁకలమాటల జెలి గారవించు టరుదా
మూఁకవనితలసిగ్గు ముంగిట వేసేకన్నులు
ఆఁక నీసతి మోహ ముందుకొనలేదా

ముంచి కాంత నురమున మోచుకుండే నీ మేను
ఇంచుకు పరిసురత మిందు కోర్చుటరుదా
యెంచఁగ శ్రీవేంకటేశ యింతి నిట్టె కూడితివి
మంచముపై నుండి మీరు మమ్ము నంపవలదా

Watch for audio - https://youtu.be/1Y0ySAXwev4