నీదాఁకా వలెనా నిచ్చలు నారాయణా - Nidaka Valena Nichala Narayana

నీదాఁకా వలెనా నిచ్చలు నారాయణా
ఆది నీ దాసుఁడే చాలు నందరి రక్షించను

నీ పాదమూలమున నిలిచిన జలమును
మోపుగా మోచె రుద్రుఁడు ముందు ముందే
కాపాడు నీ నామమునఁ గలిగిన మహిమచే
పైపై మునులు యిహపరములు గనిరి

పండేటి పాలవెల్లి నీ ప్రసాదమునఁ గాదె
దండిగా దేవతలెల్ల ధన్యులైరి
అండనే నీసాకార మాతుమఁ దలఁచి కాదె
నిండిన యోగీంద్రులు నిత్యముక్తులైరి

చేరి నీవిహారమైన శ్రీవేంకటాద్రిఁ గాదె
కోరి నరులు వరాలు కొల్లగొనిరి
ఆరీతిఁ దాళ్లపాక‌ అన్నమయ్య ఘనుఁడాయ
వారివారమై నేము వహికినెక్కితిమి

Watch for Audio - https://youtu.be/0OKRP6RTbNw 

తొల్లిటివలెఁగావు తుమ్మెదా - TollitivaleGavu Tummeda

తొల్లిటివలెఁ గావు తుమ్మెదా యింక
నొల్లవుగా మమ్మునో తుమ్మెదా

తోరంపు రచనల తుమ్మెదా కడుఁ
దూరేవుగొందులే తుమ్మెదా
దూరిన నెఱఁగవు తుమ్మెదా మమ్ము
నోరగఁజూడకువో వోతుమ్మెదా

తొలుప్రాయపు మిండ తుమ్మెదా కడుఁ
దొలిచేవు చేఁగలే తుమ్మెదా
తొలుకరి మెఱుఁగవే తుమ్మెదా యింక
నులికేవు మముఁగని వో వోతుమ్మెదా

దొరవు వేంకటగిరి తుమ్మెదా మా
తురు మేల చెనకేవు తుమ్మెదా
దొరకె నీచనవులు తుమ్మెదా యింక
నొరు లెఱింగిరి గదవో వోతుమ్మెదా

Watch for Audio - https://youtu.be/K15-YUpRwrk 

గరిమతో వెరపేల - Garimato Verapela

గరిమతో వెరపేల కమలాక్షు దాసులకు
పరమపద మొక్కటే ఫలమింతే కాక

పాపమెంత పుణ్యమెంత ప్రపన్నాధికారులకు
దాఁప నవి నిమిషమాత్రములే కాక
లోపలేడ వెలియాడ లోకులకింతే కాక
మోపినదంతా యేకముఖమే కాక

రాతిరేది పగలేది రమించు సాత్వికులకు
యీతల నింతా వెలుఁగింతే కాక
ఘాతలఁ గర్మాకర్మగతులు యీసంది వింతే
పోతరించి యెక్కనెక్కఁ బోడవే కాక

చింతలేల సిలుగేల శ్రీవేంకటేశ్వరుని
వంతుల నమ్మినయట్టి వైష్ణవులకు
జంతువుల పురుఁడులు జడులకింతేకాక
వింతవింత సుద్దులేల విభవమే కాక 

Watch for Audio - https://youtu.be/4F0rDBWyJcs 

నీవేకా చెప్పఁజూప - Niveka Ceppajupa

నీవేకా చెప్పఁజూప నీవె నీవెకా
శ్రీ విభుప్రతినిధివి సేన మొదలారి

నీవేకా కట్టెదుర నిలుచుండి హరివద్ద
దేవతలఁ గనిపించే దేవుఁడవు
యేవంక విచ్చేసినాను యిందిరాపతికి నిజ-
సేవకుఁడవు నీవెకా సేనమొదలారి

పసిఁడి బద్దలవారు పదిగోట్లు గొలువ
దెసలఁ బంపులువంపే దీరుఁడవు
వసముగా ముజ్జగాలవారి నిందరిని నీ-
సిసువులఁగా నేలిన సేనమొదలారి

దొరలై నయసురుల తుత్తుమురు సేసి జగ-
మిరవుగా నేలితి వేకరాజ్యమై
పరగుసూత్రవతీ పతివై వేంకటవిభు-
సిరుల పెన్నిధి నీవే సేనమొదలారి

Watch for Audio - https://youtu.be/g2IC0RwrAPk 

ఏల మోసపోయిరొకో - Ela Mosapoiroko

ఏల మోసపోయిరొకో యెంచి కాలపువారు
బాలకృష్ణునిబంట్లై బ్రదుకవద్దా

పసులఁగాచేవాని బ్రహ్మ నుతించెనంటేను
దెసల దేవుఁడేయని తెలియవద్దా
సిసువు గోవర్ధనాద్రి చేతఁ బట్టి యెత్తెనంటే
కొస రీతనిపాదాలే కొలువవద్దా

నరునికి విశ్వరూపున్నతిఁ జూపెనంటేను
నరహరి యితఁడని నమ్మవద్దా
పరగఁ జక్రముచేత భాణుని నఱకెనంటే
సొరి దీతని శరణుచొఱవద్దా

అందరుసురలలోన నగ్రపూజ గొన్నప్పుడే
చెంది యీతనికృపకుఁ జేరవద్దా
అంది శ్రీవేంకటేశుఁ డట్టె ద్రిష్టదైవమంటే
విందులఁ బరులసేవ విడువవద్దా 

Watch for Audio - https://youtu.be/WjuRkV8Y9d0 

చూడరమ్మ చెలులార - Cudaramma Celulara

చూడరమ్మ చెలులార జూటితఁడు
యీడుజోడై వినయాలు యెంత సేసీ నితఁడు

సన్నల సారెసారె సాగిలి నే మొక్కఁగాను
యెన్నేసి నవ్వులు నవ్వీ నితఁడు
కన్నులఁ దప్పక నేను కాఁగిలించి చూడఁగాను
వున్నతి తానేల లోఁగీ వూరకైనా నితఁడు

కూరిమి నిలుచుండి నే కొలువులు సేయఁగాను
యీరీతి చెఱఁగువట్టీ యీతఁడు
తారుకాణలైనట్టు తన్ను నేనే పాడఁగాను
ఆరిసి తా చెక్కునొక్కీ నంతలోనే యీతఁడు

చింతదీర తనకు నే సేవలెల్లాఁ జేయఁగాను
యింతలోనే కాఁగిలించీ నితఁడు
అంతటి శ్రీ వేంకటేశుఁడని నే తన్నుఁ గూడితి
సంతోసములెల్లా రేఁచి చనవిచ్చీ నితఁడు 

Watch for Audio - https://youtu.be/toFWhNlA9Ac 

కొలువు విరిసె నిదె - Koluvu Virise Nide

కొలువు విరిసె నిదె గోవిందుఁడు పొద్దువోయ
వెలుపట నుక్కళాలు వేగుదాఁకా నుండరో

యీ పొద్దుకుఁ బోయిరారో ఇంద్రాది దేవతలు
శ్రీపతి పవ్వళించెను శేషునిమీఁద
తీపులఁ బ్రసాదమీరో దేవమునులకు నెల్ల
వైపుగఁ దెల్లవారఁగ వత్తురుగాని

పాళెలపట్టుకుఁ బోరో బ్రహ్మరుద్రాదు లిందరు
పాలసముద్రాన హరి పవ్వళించెను
వేళగాదు లోనికిట్టె విచ్చేసె హరి ద్వార-
పాలకులు వాకిళ్ళఁ బదిలము సుండో

గీత మొయ్యనే పాడరో కిన్నర కింపురుషులు
యీతల శ్రీవేంకటేశుఁ డెక్కెను మేడ
ఘాత నెడనెడ నూడిగకాండ్లు నిలువరో
రాతిరెప్పుడైనా మిమ్ము రమ్మనునో యతఁడు

Watch for Audio - https://youtu.be/AZcrGJYHUWA 

దేవతలు చెలఁగిరి - Devatalu Chelagiri

దేవతలు చెలఁగిరి దిక్కులెల్లా సంతోషించె
ఆవల నసురలెల్ల నడఁగిరి యపుడే

అందమై మధురలోన నదివో కృష్ణావతారఁ
మందెను శ్రావణబహుళాష్టమి నేఁడు
దిందుపడిరి దేవకీదేవి వసుదేవుఁడును
అందిరి బ్రహ్మనంద మంతరంగములను 

నడుమరేపల్లెలోన నందగోప యశోదల
కొడుకై పెరిగెనదే గోవిందుఁడు
అడరి గోపికలును ఆవులమందలును
వుడివోనివేడుకల నుప్పొంగఁ గలిగెను 

ఇప్పుడు శ్రీవేంకటాద్రి నిదె తిరుపతిలోన
వుప్పతిల్లి దేవుఁడై వున్నాఁడిదే
చిప్పిలి సేవకులును శ్రీసతిదేవియును
కప్పి నానాగతులఁ బొగడఁగఁ దొడఁగిరి 

Watch for Audio - https://youtu.be/hnA5HyObJmc 

జీవాత్ముడై యుండుచిలుకా - Jeevatmudai YunduChiluka

జీవాత్ముడై యుండు చిలుకా నీ-
వావలికి పరమాత్ముఁడై యుండు చిలుకా

ఆతుమపంజరములోన నయముననుండి నాచేతనేపెరిగిన చిలుకా
జాతిగాఁ గర్మపుసంకెళ్ళఁబడి కాలఁ జేతఁ బేదైతివే చిలుకా
భాతిగాఁ జదువులు పగలురేలును నా చేత నేరిచినట్టి చిలుకా
రీతిగా దేహంపురెక్కలచాటున నుండి సీతుకోరువలేని చిలుకా

బెదరి అయిదుగురికిని భీతిఁబొందుచుఁ గడుఁ జెదరఁగఁ జూతువే చిలుకా
అదయులయ్యిన శత్రులారుగురికిఁగాక అడిచిపడుదువే నీవు చిలుకా
వదల కిటు యాహారవాంచ నటు పదివేలు వదరులు వదరేటి చిలుకా
తుదలేని మమతలు తోరమ్ము సేసి నాతోఁగూడి మెలగిన చిలుకా

నీవన నెవ్వరు నేనన నెవ్వరు నీవే నేనై యుందుఁ జిలుకా
శ్రీవేంకటాద్రిపై చిత్తములో నుండి సేవించు కొని గట్టి చిలుకా
దైవమానుషములు తలఁపించి యెపుడు నా తలఁపునఁ బాయని చిలుకా
యేవియునునిజముగా వివియేఁటికని నాకు నెఱఁగించి నటువంటి చిలుకా 

Watch for Audio - https://youtu.be/9Wu_ICkqG5Q

బడలి వున్నది - Badali Vunnadi

బడలి వున్నది మోము పచ్చి దేరీని
చిడిముడిఁ బన్నీరు చిత్తగించవయ్యా

విందువలె మా యింటికి విచ్చేసితి విన్నాళ్ళకు
కుందనపు  పీఁటమీఁదఁ  గూచుండవయ్యా
వొందిలి నిన్నంతేసి వుపచరించ నేరము
అందపు  నా చిలుక ప్రియము వినవయ్యా

నా మోమై నన్నుఁ జూచి నవ్వితి విన్నాళ్ళకు
కామించినా జవ్వనమేకాని కేదయ్యా
యే మనవలెనో నీతో నెఱఁగము మాటాడ
ఆమని మా మోవితేనె లారగించవయ్యా

కోరి నాపైఁ జేయి వేసి కూడితి విన్నాళ్ళకు
కేరుచుఁ జుట్టమవు మొక్కించుకోవయ్యా
యీ రీతి శ్రీ వేంకటేశ యిత వేదో తెలియము
నేరుపు నీ బుద్ధి నాకు నేఁడు గృపనయ్యా

Watch for Audio - https://youtu.be/5YmPTB73DeY