విశ్వరూప మిదివో - Viswarupamidivo

విశ్వరూప మిదివో విష్ణురూప మిదివో
శాశ్వతులమైతి మింక జయము మా జన్మము

కొండవంటి హరిరూపు గురుతైన తిరుమల
పండిన వృక్షములే కల్పతరువులు
నిండిన మృగాదులెల్ల నిత్యముక్త జనములు
మెండుగఁ బ్రత్యక్షమాయ మేలువో నా జన్మము

మేడవంటి హరిరూపు మించైన పైఁడి గోపుర-
మాడనే వాలినపక్షు లమరులు
వాడలఁ గోనేటిచుట్ల వైకుంఠనగరము
యీడ మాకుఁ బొడచూపె ఇహమేపో పరము

కోటి మదనులవంటి గుడిలో చక్కనిమూర్తి
యీటులేని శ్రీవేంకటేశుఁడితఁడు
వాఁటపు సొమ్ములు ముద్రవక్షపుటలమేల్మంగ
కూటువై నన్నేలితి యెక్కువవో నాతపము 

Watch for audio - https://youtu.be/P8vDBxGpX34